Ek
het alleen oorgebly
Ek
het dikwels predikers neerhalend hoor praat oor Elia se depressie toe hy
gevoel het dat hy die enigste een is wat oorgebly het van diegene wat
getrou was aan die Here (1 Kon 19:14). Dit kom vir my voor asof die
meeste van hierdie predikers min simpatie gehad het met ‘n man wat
enkele dae van tevore nog vuur vanuit die hemel geroep het en wat nou
voor ‘n vrou vlug. Diegene wat neerkyk op hierdie moedeloos en
neerslagtige profeet, verlustig hulle oënskynlik in hulle eie
popularitiet en selfvoldaanheid. Dit is duidelik dat hulle nog nooit in
die gat was waarin hierdie man van God hom bevind het nie. Hulle dink
dat dit van hulle beter mense maak as wat hierdie man is wat oorweldig
is deur eensaamheid en die seer van verwerping akuut ervaar.
Wat hulle
klaarblyklik vergeet, is dat Elia nie die enigste was nie en nie uniek
is in sy neerslagtigheid en eensaamheid nie. Amper elke man van God het
hulleself op die een of ander stadium in ‘n soortgelyke toestand bevind.
Moses het die
woestyn ingevlug en 40 jaar van sy lewe daaraan spandeer om ‘n trop
skape op te pas … totdat al sy drome en enige hoop op grootsheid en ‘n
blink toekoms gesterf het. Kan jy jouself die vrees, twyfel en
frustrasie indink wat Moses moes deurworstel ten einde berusting te vind
daarin dat al sy voorregte hom ontneem is en dat hy ‘n oënskynlik
doellose bestaan as ‘n swerwer moes voer?
Job het openlik,
hoofstuk na hoofstuk, aan sy frustrasie uiting gegee nadat hy alles
verloor het, behalwe ‘n vrou wat hom oor sy teëspoed sleggesê het en
drie “vriende” wat hom van allerhande denkbeeldige sondes beskuldig het.
As jy deur die
profete van die Ou Testament lees, sal jy vind dat elkeen van hulle die
pyn van eensaamheid ervaar het, terwyl hulle hulpeloos toegekyk het hoe
almal rondom hulle die lewende God versaak en agter stom afgode
aangeloop het. Nie een van hierdie mans was gewild nie en baie van hulle
is deur die heersers van die dag in die tronk gegooi. Hulle is ook
valslik beskuldig deur die hordes valse profete van daardie tyd. Baie
van hulle is verbied om te preek en het dus voortgegaan en hulle
profesieë neergeskryf.
Die gordyn van die
Nuwe Testament open waar ons sien hoe Johannes die Doper met oortuiging
die koms van die Messias verkondig. Maar kort hierna word hy in die
tronk gegooi en sien ons hoe sy hoop en geloof stadig wegkwyn, tot op
die stadium wat hy die vraag vra of Jesus inderdaad die Beloofde Een is
wat sou kom (Mat 11:3).
Aan die einde van
Paulus se bediening het hy tot die besef gekom dat hy en Timoteus die
enigste van die baie predikers is wat oorgebly het, terwyl die res hulle
eie belange gaan soek het (Fil 2:21). Na een van sy hofverskynings in
Rome, moes hy baie soos Elia gevoel het, want hy sê: “Toe ek my die
eerste keer voor die hof moes verdedig, het niemand my bygestaan nie;
almal het my in die steek gelaat. Mag God hulle dit nie toereken nie!”
(2 Tim 4:16).
Ook die laaste van
die Bybels profete het dit nie anders gehad nie. Johannes was verban en
alleen op Patmos en in Openbaring lees ons dat die laaste 2 profete ook
verwerp sal word en doodgemaak sal word in die strate van Jerusalem.
Selfs Jesus was die
pyn van verwerping nie gespaar nie. Die een dag het Hy nog met duisende
gespreek en daarby het hulle ook nog ‘n gratis ete uit Sy hand geniet.
‘n Paar dae later was Hy nog besig om in Kapernaum te preek toe mense
begin het om van Hom weg te draai en Hom te verlaat, totdat later net
die twaalf oorgebly het. Ek kan my net die moedeloosheid in Sy stem
indink toe Hy vir hulle gevra het: “Wil julle nie ook weggaan
nie?”(Joh 6:67). Kan jy maar begin om die teleurstelling en
verlatenheid in Sy oë te verstaan toe Hy omgedraai het om na Petrus te
kyk wat Hom verloën het deur drie maal te ontken dat hy Hom selfs geken
het? Terwyl Hy daar aan die kruis gehang het, het amper almal Hom
verlaat en uiteindelik het ook Sy Vader Sy rug op Hom gedraai!
Elia het nie ‘n
unieke ervaring gehad nie. Dit is ’n algemene ervaring vir elke man en
vrou van die Here wat ons in die bladsye van die Bybel ontmoet. En dit
is geensins anders vandag nie. Diegene wat vir die waarheid staan en dit
spreek, is nie gewild nie en word dikwels belaster, verwerp en bejammer.
Jesus het gesê dat dit so sal wees: “’n Slaaf is nie belangriker as
sy eienaar nie. As hulle My vervolg het, sal hulle julle ook vervolg.
As hulle my woorde ter harte geneem het, sal hulle julle s’n ook ter
harte neem. Maar hulle sal dit alles aan julle doen omdat julle my
Naam bely en hulle Hom nie ken wat My gestuur het nie.” (Joh
15:20-21)
Daarom, wanneer
predikers die neerslagtigheid en wanhoop wat soveel van ons voel,
ligtelik afmaak, verklaar hulle doodeenvoudig daardeur dat hulle nie
bereid is om in die voetspore te volg van die Een waarvan Jesaja gepraat
het nie: “Hy was verag en deur die mense verstoot, ’n man van lyding
wat pyn geken het, iemand vir wie die mense die gesig wegdraai. Hy was
verag, ons het hom nie gereken nie.“ (Jes 53:3)
Moenie toelaat dat
hulle jou onderkry nie. Wanneer die aanklaer van die broeders probeer om
jou te ontmoedig omdat jy nie gewild is nie en wanneer hy probeer om jou
te laat skuldig voel, kan jy jouself daarin verheug dat jy waardig geag
is om in Sy lyding te deel. (1Pet 4:13)
Dit is in die
duisternis en leegheid van wanhoop, teleurstelling en verlatenheid waar
ons werklik die Vriend ontdek wat nader aan ons is as ‘n broer. Wanneer
ons om ons kyk en sien hoe mense van ons wegval en een vir een omdraai,
kan ons bemoedig word deur Sy belofte: “Ek sal jou nooit
verlaat nie, jou nooit in die steek laat nie.” (Heb 13:5)
Ware Christene, en
ware Christen leiers, is nie politieke figure wie se sukses gemeet kan
word aan hulle gewildheid nie. Ons moet nooit toelaat dat so ‘n wêreldse
ingesteldheid daartoe lei dat ons voel dat ons misluk het as ons nie die
skares aan ons voete het nie. Ons suksesse word slegs deur Een bepaal en
Hy kyk nie vir diegene wat die gewildste is nie, maar wel vir daardie
wat die getrouste is.
Een van die vloeke
wat vandag op ons kerke rus, is die standpunt dat ‘n prediker of kerk
gemeet moet word aan hulle getalle en popularitiet. Dit was nog nooit
God se maatstaf nie. Noag was maar een in ‘n hele wêreld vol mense.
Slegs 2 uit 600,000 Israeliete het die Beloofde Land binne gegaan. Van
die duisende wat vanuit Juda in Babilon was, het net drie nie voor die
goue beeld neergebuig nie. Jesus se aardse bediening het net 120 mense
in die bo-kamer opgelewer en Paulus en Timoteus was die enigste van ‘n
generasie wat nie op hulleself gefokus het nie.
Dit is ook vandag
nie anders nie. Wil jy graag hê dat almal rondom jou moet dink dat jy
wonderlik is terwyl jy sodoende die kans staan om verwerp te word deur
Hom wat jou geroep het? Of wil jy ook graag daardie intieme samesyn met
die Vierde Man in die vuuroond beleef?
Ek weet dat die nie
maklik is nie en nooit aangenaam is as iemand vir die hoeveelste keer
van jou af wegdraai nie. Maar die Here is getrou en toe Elia tot die
Here geroep het, het Hy hom tot hulp gekom en hom ontmoet. Die Here het
Elia verseker, net soos wat Hy ons ook verseker, dat daar ander is wat
ook getrou bly en wie die werk sal voortsit wanneer ons nie meer daar is
nie (1 Kon 19:16).
Daarom … “Hou
moed en wees dapper! Moenie bang wees nie, moenie vir hulle skrik nie,
want die Here julle God gaan saam met julle. Hy sal julle nie in die
steek laat nie, julle nie alleen laat nie.” (Deut 31:6)
Anton Bosch